Markt Heimenkirch

Was mir gwieß wissed isch, dass scho dia olte Römer a Schtroß bei is ghet hond. 838 hot ma is denn 's erscht Mol in ra Urkunde z' Sankt Galle gfunde. Do hond mir no "Hemminbah" ghoiße.

 1275 war iser Ortsname "Haimenkilch".

1491 im Summer hot dr Veit "Sürg" agfange des Schloss Syrgenstein zum baue. Vorher soll der in dr Burg Tannefels gwohnt hong.

1738 hot dr Bierbrauer Josef Fässler vu Huimekirch vom Oberamt z' Breagez (mir hond sell-mol no zua de Habsburger ghert) d' Erlaubnis kriat, dass er in Meckatz a Bier braue ka. Des war denn 's Gründungsjohr vu dr heitige "Meckatzer Löwenbräu". As hot au no dia Brauerei Karg bei is gea, dia au um dia Zit entschtande isch. Dia isch abr 1971 an d' Löwenbräu München vrkauft worde. Do drvu git's etzt niatz me.

Wia gseit, bis 1806 hond mir zua de Habsburger ghert - also zua Öschtreich. Denn hot is dr Napoleon samt de heitige Vorarlberger an Bayern gea. Des hond se se sellmol it gfalle long welle und hond an Aufschtand gmachet. Aber as hot niatz gnitzt. Beim Pariser Frieden 1814 isch denn Vorarlberg wieder zua dr Habsburger ku und mir Weschtallgaier hond bei de Boyre bleibe miasse.

Am 9. Juni 1842 isch d' Grundstoilegung vu iserer Kirche gwea.

1909 hond d' Huimekircher und d' Opfebacher de Zweckvrband Wasservrsorgung fiar dia boide Gmuinde gründet.

1927 hond dr Georg Summer und dr Robert Reich 's "Schmelzwerk Hochland" gründet. Zerscht hond se in Goßholz gschaffed. 1931 hond se d' Strohhuatfabrik Hagspiel Nacholger, Inhaber Kästner in Huimekirch kaufe kenne und sind seitdeam in iserer Gmuind. Heit hot Hochland SE, Hochland Deutschland GmbH und Hochland Natec GmbH ibr 4 000 Mitarbeiter in acht Länder ibrall auf dr Welt.

Seit 1. Juni 1932 diarfed mir is "Markt Huimekirch" nenne.

Im Moi 1978 hot ma is mit Opfebach, Thann und Wohmbrechts zue ra "Verwaltungsgemeinschaft" zämed dong. Abr dia hot it lang ghebt. Am 1. Januar 1980 isch se wieder aufglöst wore.

1980 hond d' Huimekircher und d' Opfebacher zämed mit de Thanner und Wohmbrechtser dr Abwasservrband Obre Leiblach gründet - wenigschtens des.
2008 isch iser nuis "Leiblachbad" eigwiehe wore.
2010 hon mir iser Paul-Bäck-Haus vu 1622 renoviert ghet und im Oktober eigwiehe, dr Bahnhof - dear is 1985 gschlosse wore isch - hod ma am 12. Dezember 2010 als Bahnhalt wieder eröffnet und 2012 hond mir d' Bahnhofschtroß ausbaut und em Vrkehr ibergea.